Stjórn og starfsfólk

Stjórn, starfsfólk og fagráð.

Stjórn samtakanna ber ábyrgð á stefnumótun og eftirliti, en framkvæmdastjóri hefur umsjón með daglegum rekstri. Fagráð starfar sem ráðgefandi aðili við yfirlestur útgáfuefnis og greiningu á kerfinu. Hér er gerð grein fyrir skipulagseiningunum þremur.

Stjórn

Fyrirkomulag stjórnarkjörs.

Stjórn samtakanna er skipuð ellefu fulltrúum: fimm úr opnum sætum og allt að sex úr ungliðahreyfingum stjórnmálaflokka sem eiga sæti á Alþingi. Opnu sætin hafa verið skipuð af aðalfundi; aðildarferli ungliðahreyfinga er í vinnslu. Nýir stjórnarmenn verða kynntir hér jafnóðum og tilnefningar liggja fyrir.

5 opin sæti

Fagþekking og stöðugleiki

Kjörin af aðalfundi. Einstaklingar og fulltrúar félagasamtaka sem sinna málefnum barna eiga þess kost að bjóða sig fram. Markmiðið er að tryggja að rík fagþekking og reynsla sé varanlega til staðar í stjórn, óháð pólitískum áherslum hverju sinni.

Allt að 6 tilnefnd sæti

Vettvangur fyrir framtíðarstjórnmálafólk

Tilnefnd af ungliðahreyfingum þeirra flokka á Alþingi sem eiga aðild að samtökunum. Tryggir þverpólitískt samstarf og skapar grundvöll fyrir uppbyggingu þekkingar meðal ungs stjórnmálafólks á þessu málasviði.

Varamenn

Áframhaldandi starfhæfni

Almennir varamenn úr opnum sætum leysa af almenna stjórnarmenn. Tilnefndir varamenn leysa eingöngu af fulltrúa úr sínum eigin flokki, þannig að enginn flokkur eigi tvo fulltrúa á sama stjórnarfundi. Varamenn taka sæti þegar til forfalla kemur.

Opin sæti

Fulltrúar úr opnum sætum.

Fulltrúar úr opnum sætum, kjörnir af aðalfundi.

Aðalmenn

Pétur Guðmundur Broddason

Stjórnarformaður

Pétur Guðmundur Broddason er með BA í sálfræði og diplóma í farsæld barna. Sem núverandi málstjóri farsældar hjá Reykjavíkurborg þekkir hann af eigin raun hvernig nýju farsældarlögin virka í framkvæmd. Áður stýrði hann og bar fulla fjárhags- og faglega ábyrgð á meðferðarheimilinu að Laugalandi í Eyjafjarðarsveit í 14 ár. Meðferðarheimilið rak hann undir yfirstjórn Barnaverndarstofu. Á Laugalandi vistuðust stúlkur á aldrinum 13 til 18 ára sem áttu við fjölþættan vanda að stríða. Hann hefur mikla reynslu af því að innleiða gagnreyndar meðferðir og eiga í samstarfi við allar helstu stofnanir barnaverndarkerfisins. Skýrt markmið hans er að nýta þessa þekkingu til að greina ágalla kerfisins, gera það skilvirkara og stytta biðlista barna eftir þjónustu.

Lilja Björk Guðrúnardóttir

Stjórnarmaður

Lilja Björk Guðrúnardóttir er félagsráðgjafi og er einnig með diplóma í áfengis- og vímuefnamálum (2025). Í dag leiðir hún meðferðarteymið hjá barnaverndarþjónustu Kópavogs og situr í stjórnendateymi þjónustunnar, en hún hefur níu ára reynslu af íslenska barnaverndarkerfinu — fyrst hjá Barnavernd Reykjavíkur og frá 2021 hjá Kópavogi. Hennar hjartans mál eru málefni unglinga sem eru að sýna áhættuhegðun og hefur hún unnið mikið í þeim málum í barnavernd. Í því starfi hefur hún unnið með unglingunum, fjölskyldum þeirra og þeim úrræðum sem hafa verið í boði. Hefur hún ekki farið varhluta af því úrræðaleysi sem ríkt hefur, og séð hvaða áhrif það hefur haft á unglingana og fjölskyldur þeirra sem og hvernig kerfið hefur oft reynst meiri hindrun en sá stuðningur sem það á að vera. Það er reynslan sem leiðir hana í stjórn HÆ.

Sigrún Sigurðardóttir

Stjórnarmaður

Sigrún Sigurðardóttir er fædd og uppalin á Ísafirði og er með doktorsgráðu í hjúkrunarfræði. Í dag starfar hún sem dósent við heilbrigðisvísindasvið Háskólans á Akureyri, þar sem rannsóknir hennar fjalla um áhrif ofbeldis í æsku á líf og heilsu á fullorðinsárum og hún hefur skipulagt námskeið á meistarastigi um sálræn áföll, ofbeldi og áfallamiðaða nálgun og haft yfirumsjón með þeim. Áður hefur hún m.a. starfað sem lögregluþjónn, hjúkrunarfræðingur, aðstoðarrektor við Kvikmyndaskóla Íslands og sem jógakennari. Sigrún hefur komið að ýmsum félagasamtökum, ýmist sem stofnandi, meðlimur í stjórn eða fagráði, eða unnið á einhvern hátt með samtökum eins og Gæfusporum (þverfaglegu meðferðarúrræði fyrir þolendur ofbeldis í æsku), Rannsóknarmiðstöð gegn ofbeldi við HA, Berginu headspace (úrræði fyrir ungt fólk), Bjarmahlíð (miðstöð fyrir þolendur ofbeldis), Múrar brotnir (listsköpun og úrvinnsla fyrir fanga) og Krabbameinsfélagið Sigurvon á Ísafirði. Það er þessi þekking á afleiðingum áfalla og ofbeldis í æsku sem hún færir í stjórn HÆ.

Guðmundur Fylkisson

Stjórnarmaður

Guðmundur Fylkisson er lögreglumaður sem hefur sérhæft sig í leit að týndum börnum í rúm 11 ár og hefur 40 ára starfsreynslu í lögreglunni. Hann var valinn manneskja ársins 2025 af lesendum Smartlands, hlustendum Rásar 2 og fréttastofu Stöðvar 2 og Sýnar. Þessa viðurkenningu hlaut hann fyrir óþrjótandi vinnu sína í þágu týndra barna, auk þess að vekja athygli á málefnum barna með fjölþættan vanda og fíknisjúkdóma. Árið 2025 nálgaðist fjöldi leitarbeiðna sem hann sinnti 400 og hafa þær aldrei verið fleiri. Guðmundur hefur jafnframt setið í stjórn Bergsins headspace, lágþröskulda- og gjaldfrjálsrar ráðgjafarþjónustu fyrir ungt fólk, allt frá undirbúningsstjórn samtakanna. Í gegnum starf sitt hefur hann kynnst af eigin raun þeim ágöllum sem eru á samspili skólakerfisins, heilbrigðiskerfisins, barnaverndarkerfisins og félagsþjónustunnar, og þeim múrum sem þarf að brjóta niður þar á milli. Hann hefur talað skýrt fyrir því að hætta þurfi að skrifa skýrslur og fara að framkvæma — því þegar viðkvæmustu hópar samfélagsins falla á milli kerfa geta afleiðingarnar orðið bæði óafturkræfar og banvænar. Það er þessi reynsla sem hann færir í stjórn HÆ.

Berglind Gunnarsdóttir

Stjórnarmaður

Berglind Gunnarsdóttir Strandberg hefur lokið Cand.Pæd.Psych. gráðu frá Danmarks Pædagogiske Universitet árið 2006 ásamt diplóma í hugrænni atferlismeðferð. Frá áramótum 2018/2019 hefur hún verið framkvæmdastjóri Foreldrahúss. Áður var hún stjórnarformaður Vímulausrar æsku-Foreldrahúss frá 2015 til 2018 og starfaði sem sáttamaður og sérfræðingur í málefnum barna hjá Sýslumanninum á höfuðborgarsvæðinu frá 2016 til 2018. Berglind hefur áralanga reynslu af því að vinna með börnum og unglingum á grunnskólaaldri vegna persónulegs eða félagslegs vanda, ásamt því að veita foreldrum og fagfólki ráðgjöf og stuðning. Það er þessi reynsla af beinni vinnu með börnum, ungmennum og fjölskyldum þeirra sem hún færir í stjórn HÆ.

Almennir varamenn

Almennir varamenn leysa af almenna stjórnarmenn þegar til forfalla kemur.

Anton Stefánsson

Varamaður

Anton Stefánsson er uppalinn á Djúpavogi og kemur að verkefninu með reynslu sem foreldri sem hefur þurft að leita eftir þjónustu og úrræðum hjá ólíkum stofnunum. Í gegnum þá reynslu hefur hann kynnst því af eigin raun hvernig kerfið getur hjálpað fólki vel en einnig hversu flókið og þungt það getur verið þegar samvinna og upplýsingaflæði milli aðila er ekki nægilega gott. Honum er sérstaklega umhugað um að einstaklingar og fjölskyldur fái stuðning fyrr, aðgengið að þjónustu verði einfaldara og að stofnanir vinni betur saman. Anton telur mikilvægt að reynsla fólks sem fer í gegnum kerfið fái meira vægi þegar verið er að þróa þjónustu og taka ákvarðanir sem hafa áhrif á líf þeirra.

Tveir almennir varamenn til viðbótar verða kynntir þegar kjör liggur fyrir.

Tilnefnd sæti

Ungliðahreyfingar flokka með sæti á Alþingi.

Tilnefningar úr ungliðahreyfingum stjórnmálaflokka sem eiga sæti á Alþingi eru í vinnslu og verða birtar þegar þær liggja fyrir.

Allt að 6 sæti, tilnefnd af ungliðahreyfingum stjórnmálaflokka sem eiga sæti á Alþingi. Ungliðahreyfingar stjórnarflokka eiga forgang og eftirstandandi sæti bjóðast ungliðahreyfingum stjórnarandstöðuflokka í hlutfalli við þingsæti móðurflokkanna. Formleg boð verða send þegar samtökin hafa hlotið skráningu á almannaheillaskrá.

Tilnefnd aðalsæti — allt að 6

Tilnefnt sæti — í vinnslu

Tilnefndir varamenn — allt að 6

Tilnefndir varamenn leysa eingöngu af fulltrúa úr sínum eigin flokki, þannig að enginn flokkur eigi tvo fulltrúa á sama stjórnarfundi. Tilnefningar eru í vinnslu.

Innra skipulag

Embætti stjórnar.

Á fyrsta stjórnarfundi eftir aðalfund kýs stjórnin úr sínum hópi eftirfarandi embætti:

Formaður: Úr röðum fulltrúa opinna sæta.
Varaformaður: Án takmarkana um sæti.
Ritari: Án takmarkana um sæti.
Gjaldkeri: Úr röðum fulltrúa opinna sæta.

Stjórnarsamsetning og rökstuðningur

Tvískipt stjórn.

Stjórn Hagsmunasamtaka Æskunnar samanstendur af ellefu fulltrúum sem skiptast í tvo hópa. Þessari samsetningu er ætlað að tryggja annars vegar faglegan stöðugleika og hins vegar þverpólitíska breidd.

Tilnefndu sætunum er hvorki ætlað að þjóna flokkspólitík né styðja einstaka flokka — tilgangurinn er menntunarlegur og samfélagslegur. Þau sem taka þátt í ungliðahreyfingum eru oftar en ekki framtíðarþingmenn, ráðherrar og sveitarstjórnarfulltrúar. Með aðild fá þau vettvang til að dýpka þekkingu sína á málefnum barna og ungmenna. Slíkur bakgrunnur, sem byggir á gagnreyndri þekkingu, hefur jákvæð áhrif á framtíðarumræðu um velferð barna í íslensku samfélagi, óháð flokkspólitískum tengslum.

Sætin eru í boði fyrir ungliðahreyfingar allra stjórnmálaflokka sem eiga sæti á Alþingi, þar sem ungliðahreyfingar stjórnarflokka eiga forgang. Eftirstandandi sæti bjóðast ungliðahreyfingum stjórnarandstöðuflokka í hlutfalli við fjölda þingsæta móðurflokkanna. Sé boði um sæti hafnað eða því ósvarað, stendur sætið autt.

Sjálfstæði stjórnarmanna

Allir stjórnarmenn starfa sem sjálfstæðir fulltrúar samtakanna samkvæmt 15. gr. samþykkta, og bera þannig ábyrgð á því að taka ákvarðanir sem best þjóna hagsmunum barna og ungmenna, óháð utanaðkomandi hagsmunum. Fulltrúar ungliðahreyfinga eru ekki bundnir af stefnu flokka sinna á stjórnarfundum, heldur er hlutverk þeirra samkvæmt samþykktunum að þjóna hagsmunum barna. Nánari upplýsingar má finna í samþykktum samtakanna (A2.1) og hagsmunaárekstrastefnu (A2.4).

Ábyrgðarsvið

Verksvið stjórnar.

Stefnumótun

Stjórn setur meginstefnu samtakanna, staðfestir starfsáætlun og fjárhagsáætlun, og metur árangur af starfseminni.

Eftirlit

Stjórn hefur yfirumsjón með daglegum rekstri, fer yfir mánaðarlegar skýrslur framkvæmdastjóra og ber ábyrgð á því að starfsemi sé í samræmi við lög og samþykktir.

Fjármál

Stjórn samþykkir fjárhagsáætlun, hefur eftirlit með rekstrarstöðu og tryggir að ársreikningur sé endurskoðaður og gefinn út opinberlega.

Siðferðileg viðmið

Stjórn ber ábyrgð á siðareglum og kvörtunarferlum, og fer með úrvinnslu tilkynninga er varða starfsmenn og stjórnarmenn.

Stjórnarfundir eru haldnir að lágmarki sex sinnum á ári. Framkvæmdastjóri skilar mánaðarlegri rekstrarskýrslu. Skjalið A2.2 · Hlutverk og skyldur stjórnar og nefnda skilgreinir ábyrgðina í heild.

Framkvæmdastjóri

Umsjón daglegs rekstrar.

Framkvæmdastjóri sinnir daglegum rekstri, samskiptum við fjölmiðla og ytri aðila, auk annarra mála sem ekki falla sérstaklega undir verksvið stjórnar. Ábyrgðarsvið framkvæmdastjóra er skilgreint í samþykktum samtakanna ásamt ramma um ákvarðanatöku (A2.3).

Til að viðhalda skýrum aðskilnaði milli daglegs rekstrar og yfirumsjónar stjórnar hefur framkvæmdastjóri ekki atkvæðisrétt í stjórn. Hann hefur hins vegar setu- og tillögurétt á öllum stjórnarfundum til að tryggja upplýsingaflæði og gott samráð.

Alexander Gunnarsson

Framkvæmdastjóri

Alexander Gunnarsson er framkvæmdastjóri HÆ. Undanfarin ár hefur hann starfað dagsdaglega við að aðstoða fólk við að leita réttar síns gagnvart hinu opinbera — í gegnum stjórnsýsluna og alla leið fyrir dómstóla — og þekkir af eigin raun hvar kerfið bregst og hvernig á að knýja fram svör með upplýsingabeiðnum, kærum og þrautseigju. Hann hefur jafnframt sótt sér sérhæfða þjálfun hjá erlendum stofnunum í forystu, skipulagningu og fjáröflun, komið að stofnun fyrirtækja og starfað sem ráðgjafi stjórnmálaflokka við gagnaöflun og skipulag — reynsla sem gefur honum verkfærin til að byggja samtökin upp og draga kerfið til ábyrgðar.

Erindi hans er persónulegt. Hann missti systur sína, sautján ára, í kerfi sem náði ekki að grípa hana. Sú reynsla — og sú sannfæring að ástandið hafi fremur þyngst en batnað á árunum síðan — varð til þess að hann tók þetta verkefni að sér. Þetta tvennt — ásamt faglegri getu til að byggja upp og berjast við kerfið — er það sem hann leiðir HÆ með.

alexander@hagsmunasamtokaeskunnar.is

Fagráð

Ráðgefandi aðili vegna útgáfu og kerfisgreiningar.

Fagráð samtakanna er ráðgefandi hópur skipaður sérfræðingum úr stjórnsýslu, fræðasamfélaginu, lögfræði og — ekki síst — fólki sem vinnur með börnum á gólfinu. Þar er pláss fyrir öll þau sem geta hjálpað okkur að dýpka skilning okkar á kerfinu og greina kerfisbresti. Ráðið yfirfer skýrslur og útgáfuefni áður en það er birt. Aðild er unnin í sjálfboðastarfi og felur ekki í sér ákvörðunarvald um stefnu samtakanna.

Nánar um fagráð →